Renovasjon
ÅRIM hentar restavfall, papir og plast heime hos om lag 37 000 kundar i tolv kommunar i Ålesundregionen. Selskapet har kontrakt med RenoNorden, som hentar avfallet i alle kommunane. Restavfallet blir levert til forbrenning til Tafjord Kraftvarme. Papiret blir sendt vidare til gjenvinning i Tyskland og Nederland på gassdrivne fraktebåtar frå Ålesund. Plastemballasjen blir sendt til plastsorteringsanlegg i Noreg, Sverige og Tyskland.
Slam
ÅRIM tømmer om lag 10 000 slamtankar, rundt om i kommunane som eig selskapet. Slammet blir brukt til å lage kompost. I dag skjer dette på Vestnes, Vigra, Harøya og i Ålesund. Tankane blir kontrollert ved tømming. Kundar som har feil ved anlegga får informasjon om dette. ÅRIM har kontrakt med Miljøservice, som tømmer alle tankane.
Miljøstasjon
ÅRIM har ansvar for ni miljøstasjonar i Ålesundregionen. Her kan innbyggjarar levere alle typar avfall til gjenvinning. Avfallet som blir levert inn blir trygt behandla og materialgjenvunne i størst mogleg grad. ÅRIM har eigne tilsette på Bingsa og i Haram. I dei andre kommunane har selskapet avtalar med ulike aktørar som utfører oppgåvene.
Mobil miljøstasjon
I første halvår køyrer ÅRIM sin mobile miljøstasjon og samlar inn miljøfarleg avfall der folk bur. Bilen stoppar på tettstadar og ved butikkar.
Selskapet har også ein mobil miljøstasjon som hentar avfall heime hos folk i Stordal og bygdene Norddal, Eidsdal og Geiranger. Innbyggjarane bestiller henting på nettsida til ÅRIM, så kjem den mobile miljøstasjonen på avtalt dag.
Returpunkt
ÅRIM har om lag hundre returpunkt for glas og metall plassert rundt omkring i kommunane. Punkta blir plassert nær der folk ferdast, nær butikkar, skular, og andre sentrale møtepunkt.
Informasjon og haldningsskapande arbeid
Selskapet driv eit aktivt informasjonsarbeid retta mot fleire målgrupper . Informasjonen gjer folk kjent med tenestetilbodet, og har som mål å få mest mogleg avfall til gjenvinning. ÅRIM har også noko haldningsskapande arbeid, blant anna retta mot framandspråklege, barn og unge.