ÅRIM vil samle inn matavfall og lage biogass og biogjødsel. Dette gir betre ressursutnytting enn ved å energigjenvinne (brenne) avfallet.
Avfall til biogass og biogjødsel
Ved produksjon av biogass går ressursane i avfallet i kretsløp fleire gonger. Sidan biodrivstoff erstattar fossil diesel, viser det samla reknestykket ved å produsere biogass at dette gir nullutslepp av CO2.
Når vi produserer biogjødsel tek vi også vare på dei verdifulle næringsstoffa nitrogen og fosfor. Fosfor er ein ikkje-fornybar-ressurs som er sett opp på EU si liste over kritiske råvarer sidan utnyttinga er for dårleg i dag.
Avfall til varmegjenvinning
Ved varmegjenvinning blir ressursane i avfallet berre utnytta ein gong, så er det stopp. Energien erstattar hovudsakleg straum frå vasskraft, vi får difor ikkje samme effekten som ved å erstatte diesel.
Å hente fosfor ut av aska kan vere teknisk mulig i framtida, men svært ressurskrevjande. Dette er det ingen selskap som har løysingar for i Noreg i dag.
Matavfall til biologisk behandling tek vare på næringsstoffa
Det er viktig for den globale forsyningssikkerheita for mat, at vi utnyttar organisk avfall slik at næringsstoffa blir brukt om igjen. EU har sett fosfor opp på lista over kritiske råstoff.
I 2015 kom rapporten betre utnytting av fosfor i Noreg frå Miljødirektoratet - her er biogass ei tilrådd behandlingsform og strategi for sirkulær økonomi og fosforgjenvinning.